Barrio Sésamo: O baile da enerxía

Barrio Sésamo: O baile da enerxía é un xogo musical que lles ensina aos alumnos de educación infantil e primaria como os alimentos saudables ofrecen a enerxía que precisan para a actividade física. Este xogo da alimentación saudable fará os nenos bailar, aprender a importancia da comida como fonte de enerxía e mais participar nun xogo de imaxinación. A idea é imprimir as fichas de alimentos saudables que inclúe o xogo-baile (ovos, brócoli, laranxas, iogures, etc.)e pegalas nun cartón forte antes de recortalas. As fichas están dispoñibles no enlace da ficha, na páxina 33. Os nenos reúnense nun lugar espazoso, no patio ou nunha aula ampla. O profesor poralles música e convidaraos a bailar. Ao cabo dun cacho, o titor ha de ir baixando aos poucos o volume: cando o volume estea tan baixiño que non o poidan oír, explícaselles aos escolares que quedaron “sen enerxía”. Que cómpre facer daquela para recuperaren a enerxía perdida e seguir bailando? Os alumnos e alumnas terán que razoar que precisan comer os alimentos saudables das fichas: cando dean coa clave, poderán seguir a bailar! Barrio Sésamo: O baile da enerxía, creado pola asociación Sesame Workshop, é un singular xogo, doado de pór en práctica, que lle ofrece ao profesorado de infantil e primaria a oportunidade de traballar a importancia da alimentación saudable dun xeito moi divertido (e activo) cos seus alumnos.