The Importance of Healthy Food (Elikadura osasuntsuaren garrantzia)

Bideo hezitzaile honek osasuntsu elikatzea eta elikagai gutxiko janari kaloriatsuak murriztea zein garrantzitsua den azaltzen die, Haur Hezkuntzako eta Lehen Hezkuntzako ikasleei. Ingelesez, astiro eta azpititulukin, Max-en istorioa kontatzen digu animazioak. Hanburgesak, txokolatea eta patata frijituak jatea maite duen haurra da Max, guztiak “zabor-jana” deritzenak. Amak jaki horiek jan ditzakeela esaten dio, baina noizbehinka baino ez. Elikadura janari osasuntsu eta orekatuetan oinarritu behar duela azaltzen dio: barazkiak, okelak, arrainak, etab. Esandakoek, ordea, errealitatean gertatu ohi den legez, ez dute beharreko eraginik mutikoarengan. Amak, orduan, Ralf txakurra egokientzat jotzen duen erara elikatzeko agintzen dio Max-i. Mutikoak, zalantzarik gabe, berak jaten dituen patata frijituak eskainiko dizkio. Txakurra berehala gaixotuko da, eta lehengo energia eta alaitasuna galduko ditu. Max-i berdin gertatuko zaio, elikadura okerraren eraginez loditu eta loditu egingo baita. Zorionez, elikadura osasuntsuari esker, Max-ek eta txakurrak galdutako osasuna eta alaitasuna berreskuratuko dituzte. The Importance of Healthy Food Haur Hezkuntzako eta Lehen Hezkuntzako eskola-curriculuma indartzen duen bideo didaktikoa da, ikastetxe ingelesetarako edo elebidunetarako egokia.